Выхоўваем патрыятычныя каштоўнасныя арыентацыі вучняў
праз патэнцыял музея
Людзі зямлі павінны ведаць, ад якой небяспекі яны пазбавіліся і
якой цаной дасталося ім гэта збавенне.
В. Быкаў.
9 снежня вучні 11 класа наведалі народны гісторыка-краязнаўчы музей ДУА “Дзяніскавіцкая сярэдняя школа” ў рамках пілотнага праекта па вучэбным прадмеце “Беларуская літаратура” па тэме “Гісторыя Вялікай Айчыннай вайны ў творах беларускіх пісьменнікаў”.
Вучням для знаёмства была прапанавана музейная экспазіцыя, прысвечаная перыяду Вялікай Айчыннай і Другой сусветнай войнаў. У музеі своеасаблівымі “жывымі галасамі” з’яўляюцца наступныя рэчы: пісьмы-трохвугольнікі з франтоў, фотаздымкі салдат-аднавяскоўцаў, нямецкая каска, лыжка, вілка, кацялок, гэта і ўспаміны салдат, што ўдзельнічалі ў вызваленні Ганцавіцкага раёна ад нямецка-фашысцкіх захопнікаў. Гэтая экспазіцыя насычана фотаздымкамі аднавяскоўцаў, якія змагаліся з ворагам не толькі на франтах, але і на акупіраванай немцамі тэрыторыі. У гэтайзале засяроджваецца ўвага наведвальнікаў на тым, што кожны чалавек, незалежна ад сацыяльнага становішча, з’яўляецца асобай і павінен годна пражыць сваё жыццё. Юныя экскурсаводы, знаёмячы вучняў з лёсамі загінуўшых у гады Вялікай Айчыннай вайны аднавяскоўцаў, звяртаюцца да прысутных са словамі: “Кожны раз, успамінаючы іх, мы павінны схіліць свае галовы перад светлай памяццю нашых продкаў, якія змагаліся за Айчыну, каб мы з вамі змаглі нарадзіцца і жыць!”
Беларуская літаратура ішла дарогамі вайны, вобразна кажучы, стала ў баявыя шарэнгі, набліжала Перамогу. Палымянае мастацкае слова стала адным з самых магутных сродкаў змагання з ворагамі. Змагаліся празаікі, паэты, змагаліся іх творы. Яны, нібы салдаты ў баі, баранілі Радзіму.
Вайна... Гэта тэма наклала вельмі глыбокі адбітак на творчасць Васіля Быкава, які сам прайшоў праз жахі вайны, не раз бачыў жорсткасць фашысцкіх захопнікаў і жудасныя карціны: смерць сяброў, аднавяскоўцаў. У сваіх творах пісьменнік расказаў пра барацьбу беларускага народа, пра мужнасць партызан і падпольшчыкаў, пра жыццё франтавікоў. Вучні ўзгадвалі творы мастака слова, прысвечаныя падзеям Вялікай Айчыннай вайны, прымалі ўдзел у віктарыне, разважалі над ключавой тэмай: “Подзвіг чалавека на вайне: у чым ён?”
Проза Васіля Быкава — гэта сур'ёзны набытак для беларускай літаратуры. Яна з'яўляецца своеасаблівым абеліскам памяці тым, хто загінуў у час Вялікай Айчыннай вайны.